14
Usun än Asa nemenem
14.1-15
Iwe, Apia a mäla, nge ra peiaseni ren semelapan kewe lon ewe telinimwen Tafit. Nge Asa nöün we mwän a siwili lon wisan wisen king. Lon fansoun mwün Asa ewe fanü a kinamwe lon ükükün engol ier. Iwe, Asa a föri mine a öch o pwüng me fän mesen ewe Samol mi Lapalap an we Kot. A ataela än ekewe chon ekis rongen asor me ekewe lenien fel won ekewe leni tekia, a pwal aturala ekewe ürefau mi pin o pökükisietiu ekewe uluulun ewe anüfefin Asera. Iwe, Asa a allük ngeni ekewe chon Juta, pwe repwe föri letipen ewe Samol mi Lapalap än ar kewe lewo we Kot o aleasochisi an kewe allük me pwüüng. A pwal ataela ekewe lenien fel won ekewe leni tekia me ekewe rongen asoren ötüöt me lon ekewe telinimwen Juta meinisin. Iwe, ewe mwü a kinamwe fän nemenian. Asa a aüetä telinimw mi pöchökül tittir lon Juta, pun ewe fanü a kinamwe. Iwe, esap fis maun lon ekana ier, pun ewe Samol mi Lapalap a fang ngeni kinamwe. Asa a üreni ekewe chon Juta, “Ousipwe apöchöküla ekei telinimw o aüetä tit mi pöchökül me imw tekia ünükür, sipwe pwal föri asamalaper me lokkur. Sa chüen fanüeni ewe fanü, pun sa föri letipen ewe Samol mi Lapalap ach we Kot. Ewer, sa föri letipan, nge i a fang ngenikich kinamwe ekis meinisin.” Iei mine ra aüetä tittin ekewe telinimw o fefeitä. Iwe, a wor än Asa mwichen sounfiu ükükün ülüpükü ngeröü mwän mi uwou tittin maun me siles seni Juta, pwal rüepükü walik ngeröü mi uwou tittin maun me esefich seni Peniamin. Ekei mwän meinisin ir sounfiu mi fokun pwora.
Iwe, Sera ewe re Itiopia a tolong lon Juta fiti eu mwichen sounfiu ükükün eu million mwän me ülüpükü woken, pwe epwe maun ngeni Asa. Iwe, a tori Maresa. 10 Nge Asa a towu pwe epwe maun ngeni Sera. Iwe, ra atetteli nöür mwichen sounfiu lon ewe lemolun Sefata arap ngeni Maresa, pwe repwe maunfengen. 11 Asa a siö ngeni ewe Samol mi Lapalap an we Kot o apasa, “Ai Samol mi Lapalap, esap wor eman usun en mi tongeni alisi chon apwangapwang le maun ngeni chon pöchökül. Ai Samol mi Lapalap äm we Kot, kose mochen kopwe alisikem, pun äm aia anomu äm apilükülük womw, nge aia feito pwe aipwe maun ngeni ei mwichemongun sounfiu fän itom. Ai Samol mi Lapalap, en äm Kot, esap wor eman a tongeni akufuk.” 12 Iei mine ewe Samol mi Lapalap a akufu ekewe sounfiun Itiopia, lupwen Asa me ekewe sounfiun Juta ra maun ngeniir. Iwe, ekewe sounfiun Itiopia ra sü, 13 nge Asa me nöün kewe sounfiu ra tapweriir tori Kerar. Iwe, chomong chomong sounfiun Itiopia ra mäla, pwe resap chüen tongeni achusefäliir o maun. Ra kuf me ren ewe Samol mi Lapalap me nöün mwichen sounfiu. Iwe, ekewe re Juta ra uweela chomong choon wokur. 14 Mürin, ra ataela ekewe telinimw meinisin ünükün Kerar, pun och eniweniw seni ewe Samol mi Lapalap a tori ekewe aramasen lor. Ekewe sounfiun Juta ra pwal angei chomong choon wokur seni ekewe telinimw meinisin, pun a wor chomong pisek lor. 15 Ra pwal niela ekewe chon masen man o uweela chomong chomong sip me kamel. Mürin, ra liwiniti Jerusalem.