Paipel 2.KRONIKA 13
13
Usun än Apia nemenem
13.1-22
(1.King 15.1-8)
Lon ewe engol me waluen ierin mwün Jeropoam, Apia a tolong lon wisan wisen king o nemeni Juta. A nom lon Jerusalem o nemenem lon ükükün ülüngat ier. Iten inan we Mikaia nöün Uriel we fefin seni Kipea. Iwe, a fis maun lefilen Apia me Jeropoam.
Apia a feila maun, nge eu mwichen sounfiu mi fokun pwora ükükün föpükü ngeröü mwän ra eti. Nge Jeropoam a pwal atetteli nöün mwichen sounfiu mi fokun pwora ükükün walupükü ngeröü mwän, pwe epwe maun ngeni Apia. Lupwen ekewe ruu mwichen sounfiu ra sapechöchöfengen won chukuchukutän ewe fanü Efraim, Apia a ütä won ewe chuk Semaraim o kökköla ren Jeropoam me nöün mwichen sounfiun Israel meinisin, “Oupwe aüselingaei. Ousap silei pwe ewe Samol mi Lapalap ewe Koten Israel a eäni eu pwon mi fokun nüküchar ngeni Tafit me mwirimwirin kana, pwe repwe wisen nemeni Israel tori feilfeilachök? Nge Jeropoam nöün Nepat we mwän, eman nöün Salomon nöüwis, a ütä o pälüeni an samol. Iwe, ekoch mwän mi ngau esap wor aüchear ra chufengen ren, ra pöchökül le ü ngeni Rehopoam nöün Salomon we mwän, lupwen a chüen alüal o tipen olukat, pwe esap tongeni ü ngeniir.
Nge iei oua ekiekin ütä ngeni mwün ewe Samol mi Lapalap, a ngeni ekewe mwirimwirin Tafit pwe repwe nemenem lon. Oua eu mwich mi fokun watte, a pwal nom remi ekewe uluulun kow seni kolt Jeropoam a föri pwe ämi kewe kot. Oua asüela nöün ewe Samol mi Lapalap kewe souasor, ekewe mwirimwirin Aaron me ekewe mwän seni ewe ainangen Lefi, nge oua filätä püsin nöümi souasor usun chök chon ekewe mwü. Iteiten eman me eman mi feito fän eman nienifön kow, ika fän füman ätemwänin sip a tongeni püsin apini, pwe epwe wiseni ewe wisen souasor fän iten ekewe uluulun anümwäl esap ir kot. 10 Nge me rem, ewe Samol mi Lapalap i äm we Kot, aisap likitala i. A wor rem souasor ir mwirimwirin Aaron mi angang ngeni ewe Samol mi Lapalap, pwal ekewe mwän seni ewe ainangen Lefi mi alisiir lon ar angang. 11 Iwe, ra eäni asoren kek o keni apach mi pwokus ngeni ewe Samol mi Lapalap iteiten lesosor me lekuniol. Ra pwal iseis ekewe pilawa mi pin won ewe chepel mi limöch o keni ekewe lamp won ewe lenien atittin mi för seni kolt iteiten lekuniol. Pun äm aia föri mine ewe Samol mi Lapalap äm we Kot a allük ngenikem, nge ämi oua pöütala i. 12 Nengeni, Kot a etikem, i nöüm souemwen, nge nöün kewe souasor ra pwal nom rem fän ar kewe rappwa, pwe repwe ettiki ewe tikin asilesilen maun, pwe aipwe maun ngenikemi. Ämi aramasen Israel, ousap maun ngeni ewe Samol mi Lapalap än ämi kewe lewo we Kot, pun ousap tongeni win.”
13 Iwe, Jeropoam a tinala ekoch nöün sounfiu, pwe repwe operifetaleer o maun ngeni chon Juta me lükisökürür, nge ekewe lusun sounfiun Israel ra nom mwen ekewe chon Juta. 14 Nge lupwen ekewe chon Juta ra nenefetal, ra küna pwe ewe maun a nom mwer pwal lükisökürür. Iwe, ra siö ngeni ewe Samol mi Lapalap pwe epwe alisiir, nge ekewe souasor ra ettiki ekewe rappwa. 15 Mürin, ekewe sounfiun Juta ra arükak o maun ngeni ekewe sounfiun Israel. Iwe, Kot a akufu Jeropoam me ekewe sounfiun Israel meinisin, pwe ra kuf ren Apia me ekewe sounfiun Juta. 16 Ekewe sounfiun Israel ra sü me mwen ekewe sounfiun Juta, nge Kot a föri pwe ekewe sounfiun Juta repwe akufuur. 17 Iwe, Apia me nöün kewe sounfiu ra niela ükükün limepükü ngeröü sounfiun Israel mi kefil, pwe a wor eu ninni mi fokun watte. 18 Iei usun ekewe sounfiun Juta ra akufu ekewe sounfiun Israel lon ewe fansoun, pun ra anomu ar apilükülük won ewe Samol mi Lapalap än ar kewe lewo we Kot. 19 Apia a tapweri Jeropoam o angei seni ekewe telinimw Petel, Jesana me Efron, pwal wisoposopur kewe. 20 Nge Jeropoam esap chüen pöchökülsefäl lon mwün lupwen fansoun mwün Apia. Iwe, ewe Samol mi Lapalap a niela pwe a mäla. 21 Nge Apia a fefeitä o pöchökülela. A angei engol me füman pwülüan, pwe a wor rüe me ruoman nöün mwän me engol me wonoman nöün fefin. 22 Iwe, lusun pworausen än Apia föför meinisin me an fos a makelong lon än ewe soufos Ito puken uruwo.