12
Sisak a tolong lon ewe fanü Juta
12.1-16
(1.King 14.25-28)
Iwe, mürin än Rehopoam anüküchara mwün o pöchökülela lon an nemenem, a pöütala än ewe Samol mi Lapalap allük, nge chon Israel meinisin ra eti le föri iei usun. Lon alimuen ierin mwün ewe king Rehopoam, Sisak ewe kingen Isip a feito o maun ngeni Jerusalem, pun ir resap allükülük ngeni ewe Samol mi Lapalap. A feito fiti engeröü rüepükü woken me wone ngeröü chon wawa oris. Nge ekewe sounfiu mi eti seni Isip, ekewe chon Lipia, Suki me chon Itiopia resap lea. Iwe, Sisak a liapeni ekewe telinimwen Juta mi pöchökül tittir o feila tori Jerusalem. Mürin, ewe soufos Semaia a feila ren Rehopoam me ekewe samolun Juta mi chufengen lon Jerusalem, pokiten ra sü me mwen Sisak. Iwe, a üreniir, “Iei alon ewe Samol mi Lapalap ngenikemi: Ämi oua pöütieila, iei mine üa asechikemiilong lepöün Sisak.” Mürin, ekewe samolun Israel me ewe king ra mefi ar tipis o apasa, “A pwüng mine ewe Samol mi Lapalap a föri.” Iwe, lupwen ewe Samol mi Lapalap a küna ei, a kapassefäl ngeni Semaia o üreni, “Üa küna pwe ra mefi ar tipis. Üsap aroserela, nge üpwe ekis angaserela. Ai lingeringer esap unus ngeni Jerusalem ren Sisak. Nge repwe angang ngeni Sisak, pwe repwe mefi sokofesenin ar angang ngeniei me ar angang ngeni kingen ekewe fanü.”
Lupwen Sisak ewe kingen Isip a maun ngeni Jerusalem o liapeni, a angei ekewe pisek mi aüchea me lon imwen ewe Samol mi Lapalap, pwal ekewe pisek mi aüchea me lon imwen ewe king, o uweerela meinisin. A pwal uweela ekewe tittin maun seni kolt meinisin Salomon a föriir. 1.King 10.16-17; 2.Kron 9.15-16 10 Iwe, ewe king Rehopoam a föri tittin maun seni piras akasiwilin ekewe tittin maun seni kolt o ngeni ekewe meilapen chon mas mi mamasa asamalapen imwen ewe king. 11 Iteiten fansoun, lupwen ewe king a feila lon imwen ewe Samol mi Lapalap, ekewe chon mas ra eti o uwei ekewe tittin maun, mürin ra aliwinirela ngeni ewe rumwen chon mas. 12 Pokiten Rehopoam a atekisona, än ewe Samol mi Lapalap lingeringer a kul seni, pwe esap unusen afeiengaua, nge än chon Juta nonom lon lenier a öchsefäl.
13 Iwe, ewe king Rehopoam a anüküchara mwün o nemenem lon Jerusalem. Rehopoam a ierini faik me eu, lupwen a tolong lon wisan wisen king. A nemenem lon ükükün engol me fisu ier lon Jerusalem, ewe telinimw ewe Samol mi Lapalap a filätä me lein telinimwen ekewe ainangen Israel meinisin, pwe aramas repwe fel ngeni ie. Iten inan Naama, eman fin Amon. 14 Nge Rehopoam a föri mine a ngau me fän mesen ewe Samol mi Lapalap, pun esap kütta letipen ewe Samol mi Lapalap ren unusen lelukan.
15 Iwe, pworausen än Rehopoam kewe föför seni lepoputan tori lesopolan an nemenem a makelong lon än ewe soufos Semaia puken uruwo, pwal lon än ewe soufos Ito puken uruwo. Lon ei fansoun a chök fifis maun lefilen Rehopoam me Jeropoam. 16 Iwe, Rehopoam a mäla, nge ra peiaseni ren semelapan kewe lon ewe telinimwen Tafit, nge Apia nöün we mwän a siwili lon wisan wisen king.

12:9: 1.King 10.16-17; 2.Kron 9.15-16