Paipel 1 TIMOTY 4
4
Ekewe chon afalafal chofona
4.1-5
Iwe, ewe Ngünmifel a afata, pwe lon ekewe fansoun mürin ekoch aramas repwe pöütala ar lükülük, repwe rongorong ngeni ekewe ngün mi chofona o aleasochis ngeni aitien ekewe anün rochopwak. Ekei sokun kapasen kait ra chöüfeil ren ekewe chon chofona mi atuputup, mwelien letiper a mä, ra usun itä nge ra kar ren efoch mächä mi fokun sarara. Ekei sokun aramas ra afalafala pwe a ngau pwüpwülü, ra pwal apini ekoch sokun mongö. Nge Kot a awora ekei sokun mongö pwe sipwe mongö. Iwe, kich mi lükü o silei ewe let sipwe eni ewe mongö fän ach iotekin kilisou. Pun meinisin mine Kot a föri a mürina. Esap wor och sipwe oput are sipwe angei fän ach iotekin kilisou, pun än Kot kapas me ewe iotek ra afisätä pwe epwe mürina me ren Kot.
Eman chon angangen Kraist Jesus mi mürina
4.6-16
Iwe, are kopwe aiti ngeni pwiüm kewe souläng ekei kapasen öüröür, kopwe eman chon angangen Kraist Jesus mi mürina. Kopwe püsin amongöni ngünum ekewe kapasen lükülük, pwal ekewe kapasen kait ka fen aleasochisi tori ikenai. Kopwe afäluk ren ekewe tutulap mi ü ngeni ewe kapasen Kot, esap wor lomoten ach sipwe apworausa, nge kopwe chök achocho le asipok lon om souläng. Pun ach achocho le asipa inisich a atoto ekis chök feiöch, nge ach achocho le asipakich lon ach souläng a atoto rech feiöch meinisin, pun a pwon ngenikich manau lon ei fansoun ikenai pwal lon ekewe fansoun repwe feito. A allükülük ei kapas pwe aramas repwe fokun etiwa o lükü. 10 Iei popun sia achocho le angang weires, pun sia anomu ach apilükülük won ewe Kot mi manau, i ewe Chon Amanau fän iten aramas meinisin, nge lapalan fän iten chokewe mi lükü ewe kapasen Kot.
11 Kopwe afalafala o aiti ngeni ekewe souläng ekei kapasen öüröür me ekei kapasen kait. 12 Kopwe tümwünuk, pwe esap wor eman epwe urumwoteek pokiten om alüal, nge kopwe eu lenien apirü ngeni ekewe chon lükü lon om kapas, lon om föför, lon om chen, lon om lükülük, pwal lon om limöch. 13 Tori ai üpwe war, kopwe likitü lon om aleani ekewe Toropwe mi Pin ngeni ekewe souläng, kopwe afalafaleer usun o asukula ngeniir. 14 Kosap tümwününgau ngeni ewe lifang seni ewe Ngünmifel, a toruk ren än ekewe soufos kapas, lupwen ekewe souakom ra iseis pöür womw. 15 Kopwe föri pwüngün ekei mettoch o fokun achocho ngeni om kopwe apwönüretä, pwe aramas meinisin repwe küna om fefeitä lon om souläng. 16 Kopwe püsin tümwünuk, kopwe pwal tümwünü mine ka afalafal won. Kopwe likitü le föri ekei mettoch, pun are kopwe föri iei usun, kopwe püsin amanauok me chokewe mi aüselingok.