2
Än Paulus kapasen öüröür usun angangen fel
2.1-15
Iwe, mwen mettoch meinisin üa pese ngonuk, pwe souläng repwe iotekin tüngor me kilisou ngeni Kot fänäsengesin aramas meinisin, fänäsengesin ekewe king me ekewe nöüwis meinisin, pwe sipwe manaueni eu manau fän mosonoson me kinamwe, sipwe pwal asamolu Kot o aramasöch ngeni aramas. Pun iei a mürina o apwapwai Kot ach Chon Amanau, i ewe mi mochen pwe aramas meinisin repwe küna manau, repwe pwal silei ewe let. Pun mi wor eman chök Kot, pwal eman chök chon afför lefilen Kot me aramas kana, iei i ewe aramas Kraist Jesus, i ewe mi fangala püsin manauan, pwe epwe angasala aramas meinisin seni tipis. Iei och minen pwärätä lon fansoun mi fich, pwe Kot a mochen pwe aramas meinisin repwe küna manau. Iei popun üa fil pwe üpwe eman soukünö me eman senseen ekewe chon lükün Israel ai üpwe arongafeili ewe kapasen lükülük me let. Ngang üa kapas wenechar, üsap chofona. 2.Tim 1.11
Üa mochen pwe lon ekewe lenien fel meinisin mwän repwe iotek, ir mwän mi pin fän iten Kot, repwe aitietä pöür lon ar iotek, nge resap song ika anini.
Üa pwal mochen pwe ekewe fefin repwe üföüföch, repwe öüköchü üfer o üföüf sokun üf mi fich ngeni souläng. Resap firesi mökürer ren sokopaten fifires, ika mwärämwär kolt ika fau aüchea ika üföüf üf mi mömong, 1.Pet 3.3 10 nge repwe foute ngeniir föför mürina usun a fich ngeni fefin kana mi souläng. 11 Ekewe fefin repwe kaiö fän mosonoson me tipetekison. 12 Üsap mwüt ngeniir pwe repwe asukul ika repwe nemenem won mwän. Repwe fokun tipemosonoson. 13 Pun Kot a akomwen föri Atam, mürin a föri Efa. Ken 2.7,21-22 14 Iwe, esap Atam a tupula, nge ewe fefin a tupula o atai än Kot allük. Ken 3.1-6 15 Nge ekewe fefin repwe küna manau ren ar nöünöü, are repwe likitü lon ar lükü, lon ar eäni chen, lon ar pin me mirit.

2:7: 2.Tim 1.11

2:9: 1.Pet 3.3

2:13: Ken 2.7,21-22

2:14: Ken 3.1-6