Aeuin nöün Paulus Toropwe ngeni ekewe Souläng lon
Tesalonika
Kapas akom
I. Chon makkei ei toropwe: Ewe soukünö Paulus.
II. A mak ngeni iö: Ngeni ekewe souläng lon Tesalonika.
III. Itelapemongen ei toropwe: Paulus a apöchöküla ekewe souläng pwe repwe nüküchar lon ar lükülük.
IV. Kapas aüchean ei toropwe: Souläng repwe apilükülüköch ngeni ewe fansoun än Jesus liwinsefäl.
V. Masouen ei toropwe: Tesalonika iei ewe samolun telinimw lon ewe fanü Masetonia mi nom fän nemenien ewe mwün Rom. Paulus a popuetä eu mwichefel ikenan mürin an feila seni Filipi. Nge a müttir fis pwe a wor chon Juta mi ü ngeni Paulus, pun ra lolowoiti pwönüetän än Paulus afalafala ewe kapasen Kot ngeni ekewe aramas esap ir chon Juta, ir chokewe mi mochen silei usun ewe lamalamen chon Juta. Ra asüela Paulus, pwe a towu seni Tesalonika o feila Perea. Iwe, me mürin än Paulus tori Korint a angei eu pworaus usun nonomun ewe mwichefel lon Tesalonika seni Timoty, chiechian we mi eti lon an angang.
Paulus a makkei aeuin nöün toropwe ngeni ekewe souläng lon Tesalonika an epwe apöchöküla letiper o anüküchara ar lükülük. A pwärätä an kilisou ren an rong usun pworausen ar lükülük me tong. A achema ngeniir usun ewe sokun manau a manaueni lupwen a nom rer. Mürin a pwal pölüeni ekoch kapas ais mi fisitä seni lon ewe mwichefel usun än Jesus liwinsefälito: Ifa usun, eman chon lükü mi mäla me mwen än Kraist liwinsefälito epwe chüen eäni ewe manau esemüch? Nge inet Kraist epwe liwinsefälito? Iwe, Paulus a üreniir, pwe repwe chök sopwela lon ar angang fän mosonoson lupwen ra witiwit fän apilüköch ngeni än Kraist liwinsefäl.
VI. Tettelin masouen ei toropwe:
Kapasen kapong 1.1
Kapasen kilisou me mwareiti ekewe souläng 1.2–3.13
Kapasen fön fän iten manauen ar souläng 4.1-12
Kapasen öüröür usun än Jesus liwinsefäl 4.13–5.11
Sopolan kapasen fön 5.12-22
Kapasen lesopolan 5.23-28
1
Kapong
1.1
Äm Paulus, Silas me Timoty aia kapong ngeni chon ewe mwichefel lon Tesalonika, ir nöün Samach Kot me ach Samol Jesus Kraist: Ümöümöch me kinamwe epwe nonom remi. Föf 17.1
Än chon Tesalonika manau me lükülük
1.2-10
Äm aia kilisoufochofoch ngeni Kot fänäsengesimi meinisin lupwen aia chechemenikemi lon äm iotek. Pun aia chechemeni me mwen ach Kot i Samach usun ämi lükülük mi pwä lon ämi föför, usun ämi tong mi pwä lon ämi angang weires, pwal usun ämi apilükülüköch mi nüküchar lon ach Samol Jesus Kraist. Ämi pwiim kana, aia silei pwe Kot a echenikemi o afilikemi pwe oupwe nöün. Pun aia uwato ewe Pworausen Manau ngenikemi, sap lon kapas chök, nge ren manaman me Ngünmifel, pwal ren äm wesewesen lükü pwe a let ewe kapas. Ämi oua silei ifa usun nonomum lupwen aia nonom remi lon fansoun äm alisikemi. Ämi oua apirükem me ach Samol. Inamwo ika oua tolong lon watten riaföü, oua etiwa ewe Kapasen Kot fän pwapwa mi feito seni ewe Ngünmifel. Föf 17.5-9 Iei usun oua wiliti eu lenien apirü fän iten ekewe chon lükü meinisin mi nom lon Masetonia me Akaia. Pun esap chök ewe kapas usun ach Samol a towu senikemi o chöfetal lon Masetonia me Akaia, nge pwal ewe pworaus usun ämi lükü Kot a chöfetal ekis meinisin. Esap wor och mine aipwe chüen tongeni apasa. Ekei aramas meinisin ra kapas usun ämi etiwakem lupwen aia churikemi, pwal usun ämi kul ngeni Kot o kul seni ekewe uluulun anümwäl, pwe oupwe angang ngeni ewe Kot mi manau o wesewesen Kot, 10 pwal usun ämi witiwiti nöün we epwe feito seni läng. Iei i Jesus nöün we i a amanauasefäli seni mäla, epwe angasakich seni än Kot song epwe feito.

1:1: Föf 17.1

1:6: Föf 17.5-9