27
Tafit a nom lein ekewe chon Filistia
27.1-28.2
Iwe, Tafit a ekieki lon lelukan, “Lon eu kei rän Saul epwe nieila. Esap wor och mi mürina seni ai üpwe süla lon fanüen chon Filistia. Mürin, Saul epwe ükütiu le küttaei ekis meinisin lon ewe fanü Israel, üpwe pwal sechiwu seni lepöün.” Iei mine Tafit me nöün kewe wonopükü aramas ra towu seni fanüer o feila ren Akis nöün Maok we mwän, ewe kingen Kat. Iwe, Tafit me nöün kewe aramas fiti en me chon leimwan ra nom ren Akis lon Kat, pwal pwülüen Tafit kewe ruoman Ahinoam seni Jesreel me Apikael seni Karmel piin pwülüen mä we Napal. Nge lupwen Saul a rongorong pwe Tafit a süla Kat, esap chüen kütta.
Iwe, Tafit a üreni Akis, “Are ngang üa küna ümöümöch me reöm, kopwe mwüt ngeniei eu leni me lon eu lein ekewe telinimwen ei fanü, pwe üpwe imweimw ie. Pun pwota ngang noum chon angang üpwe nom reöm lon ewe telinimwen king?” Iei mine Akis a ngeni Tafit ewe telinimw Siklak lon ewe ränin. Iei popun Siklak a eu telinimwen ekewe kingen Juta tori ikenai. Tafit a nonom lon fanüen chon Filistia ükükün eu ier me rüanü maram.
Iwe, Tafit me nöün kewe aramas ra feila o tolong lon fanüen chon Kesur, chon Kirsi me chon Amalek. Pun seni me lom ir ra nonom lon ewe fanü tori Sur, pwal tori ewe fanü Isip. Lupwen Tafit a maun ngeni ewe fanü, a niela ekewe mwän me fefin meinisin, a pwal angei ekewe sip me kow, ekewe aas me kamel, pwal ekewe üf, o liwiniti Akis. 10 Nge lupwen Akis a ais, “Ia ka angei me ie liapom ikenai?”, Tafit a pälüeni, “Üa angei seni ewe fanü Nekep lon Juta,” ika “seni ewe Nekep fanüen ewe eterekesin Jeramel,” ika “seni ewe Nekep fanüen chon Ken.” 11 Iwe, Tafit a niela mwän me fefin meinisin, pwe resap tongeni liwinla Kat o apworausa usun mine Tafit me nöün kewe aramas ra wesewesen föri. Iei usun mine Tafit a föri lon ükükün ewe fansoun a nonom lon fanüen chon Filistia. 12 Nge Akis a lükü Tafit, pun a ekieki, “Tafit a püsin föri mine epwe uren koput me ren nöün aramasen Israel, iei mine epwe nei chon angang fansoun meinisin.”