Paipel 1.SAMUEL 23
23
Tafit a nom lon Keila pwal lon ewe fanüapö
23.1-29
Iwe, ra apworausa ngeni Tafit pwe ekewe chon Filistia ra maun ngeni chon Keila o soläni masouen ekewe lenien wichiwich umwun wiich. Iei mine Tafit a aisini ewe Samol mi Lapalap, “Ifa usun, üpwe feila o maun ngeni ekewe chon Filistia?” Nge ewe Samol mi Lapalap a üreni Tafit, “Kopwe feila, kopwe maun ngeni ekewe chon Filistia o amanaua chon Keila.” Nge nöün Tafit kewe aramas ra üreni, “Äm aia fen niuokus ikei lon Juta. Nge epwe fen ifa are aipwe feila Keila o maun ngeni ekewe mwichen sounfiun Filistia?” Mürin, Tafit a aisinisefäli ewe Samol mi Lapalap. Nge ewe Samol mi Lapalap a pälüeni, “Kopwe feila Keila, pun ngang üpwe awinnok pwe kopwe akufu ekewe chon Filistia.” Iei mine Tafit me nöün kewe aramas ra feila Keila o maun ngeni ekewe chon Filistia. Ra niela chomong me leir o uweela nöür man. Iei usun Tafit a amanaua ekewe aramasen Keila.
Iwe, lupwen Apiatar nöün Ahimelek we mwän a süla Keila ren Tafit, a uweela echö efot. Mürin, eman a asile ngeni Saul pwe Tafit a nom Keila. Iwe, Saul a üra, “Kot a atolonga Tafit lepei. Pun a püsin fötekinalong ren an tolong lon eu telinimw mi wor asamalapan me lokun.” Iwe, Saul a titi nöün kewe sounfiu pwe repwe feila Keila o pwelifeili Tafit me nöün kewe aramas fän pisekin maun. Nge lupwen Tafit a rongorong pwe Saul a ekiekin maun ngeni, a üreni ewe souasor Apiatar pwe epwe uwato ren ewe efot. 10 Mürin, Tafit a iotek, “Ai Samol mi Lapalap, Koten Israel, ngang noum chon angang üa rongorong pwe Saul a ekiekin feito Keila o ataela ewe telinimw pokitei. 11 Ifa usun, ekewe re Keila repwe fangatä ngang ngeni Saul? Ifa usun, Saul epwe feito usun ngang noum chon angang üa rongorong? Ai Samol mi Lapalap, Koten Israel, üa fokun tüngor ngonuk pwe kopwe asile ngeniei pälüen ai kei kapas ais ngonuk.” Iwe, ewe Samol mi Lapalap a üra, “Saul epwe feito.” 12 Mürin, Tafit a aisini, “Ifa usun, ekewe re Keila repwe fangatä äm me nei aramas ngeni Saul?” Nge ewe Samol mi Lapalap a pälüeni, “Ewer, repwe fangatä ämi.” 13 Mürin, Tafit me nöün aramas ina epwe ükükün wonopükü mwän ra ütä o feil seni Keila. Iwe, ra feila ekis meinisin ia ra tongeni feila ie. Nge lupwen Saul a rongorong pwe Tafit a süla seni Keila, esap chüen feila. 14 Iwe, Tafit a nonom lon ekewe lenien op mi pöchökül lon ewe fanüapö, pwal won chukuchukutän ewe fanüapön Sif. Iwe, Saul a kütta Tafit iteiten rän, nge Kot esap atolonga lepöün.
15 Iwe, Tafit a silei pwe Saul a feito pwe epwe niela. Lon ena fansoun, lupwen Tafit a nom lon Hores me lon ewe fanüapön Sif, 16 Jonatan nöün Saul we a feila ren Tafit lon Hores o apöchöküla lelukan lon an lükü Kot. 17 Iwe, a üreni, “Kosap niuokus. Pun Saul semei we esap tongeni afeiengauok. En kopwe kingen chon Israel, nge ngang üpwe kis fomw. Semei we mwo nge a pwal silei usun ei.” 18 Iwe, ekewe ruoman ra föri eu pwon fän mesen ewe Samol mi Lapalap. Mürin, Jonatan a liwiniti lenian, nge Tafit a nonomola lon Hores. 1.Sam 18.3
19 Mürin, ekewe chon Sif ra feila ren Saul mi nom lon Kipea o üreni, “Tafit a op leim lon ekewe lenien op mi pöchökül lon Hores won ewe chukutekisonun Hakila mi nom peliörün Jesimon. Kölf 54 20 Kopwe feito iei, äm king, inet echök ka mochen feito, nge wisem pwe aipwe fangatä Tafit ngonuk.” 21 Nge Saul a üra, “Ewe Samol mi Lapalap epwe afeiöchükemi, pun oua tongeei. 22 Oupwe feila o aletöchü pwe oupwe silei o küna ewe leni ia Tafit a op ie, pwal iö a küna ikenan. Pun ra apworausa ngeniei pwe a fokun tipachemsolä. 23 Iei mine oupwe küttaöchü ekewe lenien op ia a op ie o liwinsefälito rei fän pworaus mi pwüng. Mürin, ngang üpwe etikemi. Nge are epwe nom lon ewe fanü, üpwe kütta o elliapa lein ekewe eterekesin chon Juta meinisin.”
24 Iei mine ra feila o akomwola Sif mwen Saul. Iwe, Tafit me nöün kewe aramas ra nom lon ewe fanüapön Maon lon ewe fanü Arapa örün Jesimon. 25 Nge Saul me nöün kewe aramas ra feila pwe repwe kütta. Iwe, eman a asile ngeni Tafit ei pworaus, iei mine a feitiu ren ewe achau o nom lon ewe fanüapön Maon. Nge lupwen Saul a rong usun, a feila lon ewe fanüapön Maon pwe epwe tapweri Tafit. 26 Iwe, Saul me nöün kewe aramas ra pwer epek ewe chuk, nge Tafit me nöün kewe aramas ra pwer pwal ewe epek. Mürin, Tafit me nöün kewe aramas ra amüttirir pwe repwe sü seni Saul, pun Saul me nöün kewe aramas ra pachetä müriir pwe repwe liapeniir. 27 Lon ewe chök otun eman chon künö a feito ren Saul o üreni, “Kopwe müttir liwinsefäl, pun ekewe chon Filistia ra tolong lon ewe fanü.” 28 Iei mine Saul a ükütiu le tapweri Tafit o liwinla pwe epwe maun ngeni ekewe chon Filistia. Iei popun pwe ewe leni a iteni Achauen Süla. 29 Nge Tafit a feila seni ikenan o nonom lon ekewe lenien op mi pöchökül lon Engeti.

23:18: 1.Sam 18.3

23:19: Kölf 54