5
Ach pworaiti fanüfan
5.1-5
Eman mi lükü pwe Jesus ewe Kraist, i eman mi up seni Kot. Eman mi echeni eman sam a pwal echeni nöün. Iei usun sia silei pwe sia echeni nöün Kot kana, pun sia echeni Kot o aleasochisi an kewe allük. Pun wewen ach echeni Kot pwe sia aleasochisi an kewe allük. Nge an kewe allük resap weires ngenikich, Joh 14.15 pun chokana meinisin mi up seni Kot ra tongeni akufu fanüfan. Iwe, kich sia akufu fanüfan ren ach lükülük. Iö a tongeni akufu fanüfan? Ewe chök aramas mi lükü pwe Jesus i Nöün Kot.
Ewe angangen pwärätä usun Jesus Kraist
5.6-13
Jesus Kraist i ewe eman mi feito fän ewe kolukun an papatais me chaan an mäla. Esap feito ren koluk chök, nge a pwal feito ren koluk me cha. Nge püsin Ngünmifel a pwärätä pwe ei a let, pun ewe Ngünmifel i let. Mi wor ülüngat minen pwärätä: ewe Ngünmifel, ewe koluk me ewe cha. Ekei ülüngat minen pwärätä a wewefengen ar kapasen pwärätä. Sia lükü än eman aramas kapasen pwärätä, nge än Kot kapasen pwärätä a lap seni, pun iei an kapasen pwärätä usun Nöün we. 10 Iei mine eman mi lükü Nöün Kot a eäni ei kapasen pwärätä lon letipan. Nge iö esap lükü Kot a achofonai Kot, pun esap lükü met Kot a pwärätä usun Nöün we. 11 Iei ewe kapasen pwärätä: Kot a ngenikich manau esemüch, nge ei manau a nom lon Nöün we. Joh 3.36 12 Eman mi eäni Nöün Kot a eäni manau esemüch, nge eman esap eäni Nöün Kot esap eäni manau.
Ewe Manau esemüch
5.13-21
13 Ngang üa makkei ekei kapas ngenikemi, ämi mi lükü Nöün Kot, pwe oupwe silei pwe oua eäni manau esemüch. 14 A wor ach apilükülüköch lon ach churi Kot, pun sia silei pwe are sia tüngor och mine a fich ngeni letipan, a aüselingakich. 15 Are sia silei pwe a aüselingakich, ese lifilifil met sia eäni tüngor, sia pwal silei pwe sia angei met sia tüngor ngeni.
16 Are eman a küna pwiin we pwe a föri och tipis esap emweni i ngeni mäla, epwe iotek ngeni Kot, pwe epwe ngeni i manau. Iei met epwe fis fän iten chokewe ar tipis esap emweniir ngeni mäla. Nge mi wor tipis mi emweni aramas ngeni mäla, üsap apasa pwe epwe iotek ngeni Kot usun ei. 17 Föför esepwüng meinisin iei tipis, nge mi wor tipis esap emweni aramas ngeni mäla.
18 Sia silei pwe eman mi up seni Kot esap sopwela le föri tipis, pun ewe Nöün Kot a tümwünüöchü, pwe Ewe mi Ngau esap tongeni afeiengaua.
19 Sia silei pwe kich sia nöün Kot, inamwo ika unusen fanüfan a nom fän nemenien Ewe mi Ngau.
20 Sia pwal silei pwe Nöün Kot a feito o fang ngenikich ach weweöch, pwe sipwe silei ewe Kot mi let. Sia nonom lon ewe Kot mi let pwal lon Nöün we Jesus Kraist. I ewe Kot mi let me ewe manau esemüch.
21 Ämi nei kana, oupwe püsin tümwünükemi seni ekewe uluulun anümwäl.

5:3: Joh 14.15

5:11: Joh 3.36