Paipel 1 KORINT 3
3
Nöün Kot chon angang
3.1-23
Ämi pwii kana, üsap tongeni kapas ngenikemi usun ai üpwe kapas ngeni ekewe aramas mi eäni Ngünmifel. Nge üa kapas ngenikemi usun itä nge ämi soulängin fituk, usun semirit lon Kraist. Ngang üa aünükemi milik, nge üsap amongöü ngenikemi mongö mi pöchökül, pun ousap mwo tufich ngeni. Nge pwal iei ousap mwo tufich ngeni, Ipr 5.12-13 pokiten oua chüen manaueni manauen soulängin fituk. Pun lupwen a wor lolowo me aninifengen lefilemi, ifa usun ei esap alletätä pwe ämi oua pop seni ei fanüfan? Ifa usun, ousap föri föförün chon ei fanüfan? Pun are eman leimi a üra, “Ngang nöün Paulus souläng,” pwal eman a apasa, “Ngang nöün Apolos souläng,” ifa usun, ousap föri föförün chon ei fanüfan? 1.Kor 1.12 Iwe, iö Apolos? Pwal iö Paulus? Äm aia chök nöün Kot chon angang mi alisikemi pwe oupwe lükü Kraist. Eman me eman äm aia föri ewe angang ach Samol a awisa ngenikem. Ngang üa fotuki ekewe pwükil, Apolos a atütüür, nge Kot a amäriiretä. Föf 18.4-11,24-28 Iei mine ewe chon fotuki me ewe chon atütü esap wor aüchear, nge Kot echök ewe mi aüchea, pun a amärätä ekewe irä. Esap wor sokofesenin ewe chon fofot me ewe chon atütü, Kot epwe liwini ngeni eman me eman liwinin aükükün an angang a föri. Pun äm aia angangfengen lon ewe angang fän iten Kot, nge ämi än Kot tanipi.
Ämi pwal imwen Kot. 10 Ren ewe ümöümöch Kot a fang ngeniei, ngang üa föri ewe longolong usun eman mi silelap le aüetä imw, nge eman aramas a köütä won. Iwe, eman me eman epwe tümwünüöchü met epwe aüetä won. 11 Pun Kot a fen anomu Jesus Kraist pwe i chök ewe longolong, nge esap pwal wor eu longolong me lükün. 12 Ekoch repwe aea kolt, silifer ika fau aüchea pisekin köütä won ewe longolong, nge pwal ekoch repwe aea mwüch, fetilipwas ika äsät. 13 Iwe, aüchean än eman me eman angang epwe pwä me fatala lon ewe Ränin Kraist. Pun lon ena rän ekkei epwe afata angangen eman me eman. Ekkei epwe asosota än eman me eman angang, pwe epwe pwä aüchean. 14 Are ewe ekkei esap kenala mine eman a aüetä won ewe longolong, ewe chon aüetä epwe angei liwinin. 15 Nge are än eman angang a karala, esap angei liwinin. Iwe, püsin i epwe küna manau usun chök nge itä a sü seni lon ewe ekkei.
16 Ifa usun, ousap silei pwe ämi än Kot imwenfel, nge Ngünün Kot a nom lomi. 1.Kor 6.19; 2.Kor 6.16 17 Iei mine are eman a atai än Kot imwenfel, ätewe Kot epwe atai. Pun än Kot imwenfel a pin, iwe, ämi än Kot imwenfel.
18 Ousap püsin atupukemi. Are eman leimi a ekieki pwe a tipachem ren tipachemen ei fanüfan, i epwe wiliti eman aramas mi umwes fän iten an epwe wesewesen eman aramas mi tipachem. 19 Pun met ei fanüfan a ekieki pwe ina tipachem, a umwes me ren Kot. Iei usun a mak lon ekewe Toropwe mi Pin, “Kot a liapeni ekewe chon tipachem lon ar tipachemsolä.” Hiop 5.13 20 A pwal mak lon ekoch Toropwe mi Pin, “Ewe Samol a silei pwe ekiekin ekewe chon tipachem a lomotongau.” Kölf 94.11 21 Iei mine esap wor eman epwe aingaing won met aramas ra föri. Pun mettoch meinisin ra nom fän nemeniemi: 22 Paulus, Apolos me Petrus, ei fanüfan, manau me mäla, ikenai me ewe fansoun mürin, ekei mettoch meinisin ämi, 23 iwe, ämi nöün Kraist, nge Kraist nöün Kot.

3:2: Ipr 5.12-13

3:4: 1.Kor 1.12

3:6: Föf 18.4-11,24-28

3:16: 1.Kor 6.19; 2.Kor 6.16

3:19: Hiop 5.13

3:20: Kölf 94.11