13
Tafit a ekiekin uwato ewe pworofel lon Jerusalem
13.1-4
(2.Sam 6.1-11)
Iwe, Tafit a pwüngüpwüngfengen me nöün kewe meilapen sounfiu meinisin mi nemenem won ngeröü me pükü. Mürin, Tafit a kapas ngeni ekewe chon Israel meinisin, “Are a öch me remi, are a pwal letipen ewe Samol mi Lapalap ach we Kot, sipwe tinala chon künö ren pwiich kewe mi nom lon unusen ewe fanü Israel, pwal ren ekewe souasor me chon ewe ainangen Lefi mi nom lon ar kewe telinimw, pwe repwe feito rech. Mürin, sipwe angesefälieto rech än ach we Kot we pworofel, pun sisap föri iei usun lupwen mwün Saul.” Iwe, ewe mwicheichen aramas meinisin ra tipeeufengen pwe repwe föri iei usun, pun ei ekiek a pwüng me ren ekewe aramas meinisin.
Tafit a aliwinisefäli ewe pworofel
13.5-14
Iwe, Tafit a achufengeni chon Israel meinisin seni ewe chanpupu Sihor lon Isip tori ewe alen tolong lon Hamat, pwe repwe angei ewe pworofel seni Kiriat-jearim. 1.Sam 7.1-2 Nge Tafit me chon Israel meinisin ra feila Pala, iei Kiriat-jearim mi nom lon ewe fanü Juta, pwe repwe angei seni ikenan än Kot we pworofel mi iteni iten ewe Samol mi Lapalap, ewe a mot won an lenien motun king asen ekewe kerop. Eks 25.22 Iwe, ra angei än Kot we pworofel me lon imwen Apinatap o anomu won efoch minefön woken. Nge Usa me Ahio ra wisen uwei ewe woken. Tafit me chon Israel meinisin ra pworuk fän unusen ar pöchökül me fän mesen Kot ren köl me tikin ükülele me kitar, pwal ren sokopaten pisekin kaktai me rappwa.
Lupwen ra tori än Chiton lenien wichiwich umwun wiich, Usa a eitiewu pöün o amwöchü än Kot we pworofel, pun ekewe ätemwänin kow ra chepetek. 10 Nge ewe Samol mi Lapalap a song ngeni Usa o niela, pun a eitiewu pöün o amwöchü ewe pworofel. Iwe, Usa a mäla ikenan me fän mesen Kot. 11 Mürin, Tafit a riaföü pokiten ewe Samol mi Lapalap a niela Usa. Iei mine ewe leni a iteni Peres-usa * Peres-usa wewen Usa a küna kapwüng tori ikenai. 12 Lon ewe ränin Tafit a niuokusiti Kot o apasa, “Ifa usun, üpwe tongeni uwato än Kot we pworofel pwe epwe nom rei?” 13 Iei mine Tafit esap mochen angei ewe pworofel pwe epwe uwalong lon Jerusalem, nge a uwala ngeni imwen Opet-etom ewe re Kit. 14 Iwe, än Kot we pworofel a nonom ren Opet-etom lon imwan lon ükükün ülüngat maram. Nge ewe Samol mi Lapalap a afeiöchü chon leimwen Opet-etom, pwal meinisin mine a eäni. 1.Kron 26.4-5

13:5: 1.Sam 7.1-2

13:6: Eks 25.22

*13:11: Peres-usa wewen Usa a küna kapwüng

13:14: 1.Kron 26.4-5