Paipel 1.KRONIKA 12
12
Ekewe chon alisi Tafit me lon Siklak
12.1-22
Iwe, Tafit a nom lon Siklak, lupwen a sü seni ewe king Saul. Ikenan chomong sounfiu mi pwora ra feito ren Tafit pwe repwe alisi le maun. Ra uwou esefich o angöch le esefichala ekewe föün esefich, ra pwal öüla ar föün öülün ren pöüifichir me pöüimöngür. Ätekei ir seni ewe ainangen Peniamin märärin Saul. Iwe, iten nöür kewe meilap Ahieser me Joas, ätekei nöün Sema kewe mwän seni Kipea. Nge ikkei ir ekewe sounfiu: Jesiel me Pelet nöün Asmafet kewe mwän, Peraka me Jehu seni Anatot, Ismaia seni Kipeon, eman sounfiu mi pwora, pwal eman souemwenin ekewe ilik, Jeremia, Jahasiel, Johanan me Josapat seni Ketera, Elusai, Jerimot, Pealia, Semaria me Sefatia seni Haruf, Elkana, Isia, Asarel, Joeser me Jasopeam seni än Kora we cho, pwal Joela me Sepatia nöün Jeroham kewe mwän seni Ketor.
Mi wor ekoch mwän seni ewe ainangen Kat ra feila eti Tafit lon ewe leni mi pöchökül lon fanüapö, ir sounfiu mi pwora o silelap wiwiin maun, ra sip fän tittin maun me siles, nge won meser a usun chök won mesen ekewe laion, ra pwal müttir usun müttirin ekewe chia me won ekewe chuk. Ikkei iter: Eser ewe meilap, ewe aruomanün Opatia, ewe aülümanün Eliap, 10 ewe afömanün Mismana, ewe alimanün Jeremia, 11 ewe awonomanün Atai, ewe afümanün Eliel, 12 ewe awalumanün Johanan, ewe atiuemanün Elsapat, 13 ewe aengolun Jeremia, ewe engol me aemanün Makpanai. 14 Ekei mwän seni ewe ainangen Kat ra meilapen ewe mwichen sounfiu, ekewe mi kis ra nemeni ipükü, nge ekewe mi lap ra nemeni engeröü. 15 Ikkei ir ekewe mwän mi fetal lon ewe chanpupu Jortan seni epek tori epek lon ewe aeuin maram, lupwen ewe chanpupu a puwu ekis meinisin. Iwe, ra asüela chokewe meinisin mi nom lon ekewe lemol me peliötiu me pelilotou.
16 Iwe, ekoch me lein chon ekewe ainangen Peniamin me Juta ra pwal feila ren Tafit lon ewe leni mi pöchökül. 17 Tafit a towu rer o üreniir, “Are oua feito rei pwe oupwe chiechi ngeniei o alisiei, ngang üpwe fokun tipeeu ngeni ach sipwe chiechifengen. Nge are oua ekiekin afangamäei ngeni chon oputaei, inamwo ika üsap föri och mi ngau, amwo än ach kewe lewo we Kot epwe küna o apwüngükemi.” 18 Mürin, Ngünün Kot a feitiu won Amasia ewe meilapen ekewe ilik. Iwe, a apasa, “Äm aia noum, Tafit, äm aipwe etuk, en nöün Jesi we mwän. Kinamwe, kinamwe epwe toruk. Kinamwe epwe tori chokewe mi alisuk. Pun om we Kot a alisuk.” Mürin, Tafit a etiweer o awisa ngeniir wisen meilapen nöün kewe sounfiu.
19 Iwe, ekoch sounfiu seni ewe ainangen Manasa ra chu ngeni Tafit, lupwen a feito me ekewe chon Filistia, pwe repwe maun ngeni Saul. Nge Tafit esap alisi ekewe chon Filistia. Pun mürin än ekewe samolun chon Filistia pwüngüpwüngfengen ra tinala Tafit. Ra ekieki pwe Tafit epwe rik ngeni an samol Saul, nge ir repwe feiengau. 20 Lupwen Tafit a liwiniti Siklak, ekei sounfiu seni ewe ainangen Manasa ra chu ngeni: Atna, Josapat, Jetiael, Mikael, Josapat, Elihu me Siletai. Ätekei meilapen ekewe mwicheichen ngeröün sounfiu lon Manasa. 21 Iwe, ra alisi Tafit le maun ngeni ekewe mwichen aramas mi küt liaper, pun ir meinisin sounfiu mi pöchökül o pwora, ra pwal chon nemenem lon an we mwichen sounfiu. 22 Iteiten rän mwän ra feito ren Tafit pwe repwe alisi, tori a wor eu an mwichen sounfiu mi fokun watte.
Nöün Tafit mwichen sounfiu me lon Hepron
12.23-40
23 Iwe, chomong sounfiu mi uwei pisekin maun ra feila ren Tafit me lon Hepron, pwe repwe seikätä lon ewe wisen king siwilin Saul, usun mine ewe Samol mi Lapalap a fen apasa. Ikkei iteiten ekewe mwichen sounfiu: 24 Ekewe sounfiu seni ewe ainangen Juta mi uwou tittin maun me siles ükükün wonungeröü walupükü. 25 Seni ewe ainangen Simeon ätekewe mi pöchökül o pwora le maun ükükün fisungeröü ipükü. 26 Seni ewe ainangen Lefi ükükün rüanüngeröü wonopükü. 27 Pwal ewe samol Jehoiata eman mwirimwirin Aaron, nge ülüngeröü füpükü mwän ra eti. 28 Pwal Satok eman alüal mi pöchökül o pwora, nge rüe me ruoman meilap seni püsin chon leimwan ra eti. 29 Seni ewe ainangen Peniamin, ir märärin Saul, ükükün ülüngeröü, pun tori ei fansoun chomong me leir ra chüen pelieni chon leimwen Saul. 30 Seni ewe ainangen Efraim ükükün rüengeröü walupükü mwän mi pwora o pöchökül, ra iteföüla me lein än semer kewe cho. 31 Seni ewe esopun ainangen Manasa ükükün engol me walungeröü sounfiu mi kefil o föü iter, pwe repwe feila o seikätä Tafit pwe epwe king. 32 Seni ewe ainangen Isakar ükükün rüepükü samol me märärir meinisin mi nom fän nemenier. Ekei mwän ra weweiti fansoun o silei mine chon Israel repwe föri. 33 Seni ewe ainangen Sepulon ükükün limengeröü sounfiu mi sipeöch le maun, a wor ar sokopaten pisekin maun, pwe repwe alisi Tafit fän allükülük. 34 Seni ewe ainangen Naftali ükükün engeröü meilap, nge ükükün ilik me fisungeröü sounfiu mi uwou tittin maun me siles ra etiir. 35 Seni ewe ainangen Tan ükükün rüe me walungeröü wonopükü sounfiu mi molotä ngeni maun. 36 Seni ewe ainangen Aser ükükün faik ngeröü sounfiu mi sipeöch o molotä ngeni maun. 37 Seni ekewe ainangen Rupen me Kat, pwal seni ewe esopun ainangen Manasa ötiuen ewe chanpupu Jortan ükükün ipükü rüe ngeröü sounfiu mi uwou sokopaten pisekin maun meinisin.
38 Ekei sounfiu meinisin mi molotä ngeni maun ra feila Hepron fän pöchökülen ar ekiek, pwe repwe seikätä Tafit pwe epwe king won unusen Israel. Nge ekewe lusun chon Israel meinisin ra tipeeu ngeni ewe chök ekiek, pwe repwe seikätä Tafit pwe epwe king. 39 Iwe, ra nonom ikenan ren Tafit lon ükükün ülüngat rän, ra momongö o ükün, pun pwiir kewe chon Israel ra amolätä fän iter. 40 Pwal chon aruur kewe mi toau seni ekewe ainangen Isakar, Sepulon me Naftali ra feito o uwato mongö won nöür kewe aas me kamel, won sokopaten aas me ätemwänin kow. Ra uwou chomong sokun mongö: pilawa, nokop seni fiik, umwun föün wain mi apwas, wain me apüra, pwal ätemwänin kow me sip. Ei a fis, pun mi wor pwapwa me lon Israel.