1 Ikkei ir ekoch mwän ir mwirimwirin Juta: Peres, Hesron, Karmi, Hur me Sopal. 2 Iwe, Sopal semen Reaia, Reaia semen Jahat, nge Jahat semen Ahumai me Lahat. Ir än ekewe aramas mi nom lon Sora lewo. 3-4 Hur nöün Kalep we mwänichi a nöüni me won Efrat, iwe, mwirimwirin kewe poputän chon ewe telinimw Petleem. A wor ülüman nöün Hur kewe mwän: Etam, Penuel me Eser. Iwe a wor ülüman nöün Etam mwän: Jesreel, Isma me Itpas, nge iten fefiner Haselelponi. Penuel semelapen chon Ketor, nge Eser semelapen chon Husa. 5 Ashur semelapen chon Tekoa a wor ruoman pwülüan: Hela me Nara. 6 Iwe, Nara a nöüni föman mwän me won Ashur: Ahusam, Hefer, Temeni me Haashtari. 7 Nge Hela a nöüni ülüman mwän me won Ashur: Seret, Isar me Etnan. 8 Iwe, Kos semen Anup, Sopepa me ekewe eterekesin Aarel nöün Harum we mwän. 9 A wor eman mwän itan Japes, a kon iteföüla seni pwin kana. Iwe, inan we a aita ngeni Japes, pun a apasa, “Üa nöüni fän cheuch.” 10 Nge Japes a iotek ngeni ewe Koten Israel, “Ai Kot, kose mochen afeiöchüei o awatteela kiännin fanüei. Kopwe etiei o tümwünüei pwe üsap feiengauaei.” Iwe, Kot a apwönüetä mine a tüngor.

11 Iwe, Kelup pwin Sua, i semen Meir, nge Meir semen Eston. 12 Eston semen Petrafa, Pasea me Teina. Nge Teina semelapen chon Naash. Mwirimwirin ekei aramas ra nom lon Reka. 13 A wor ruoman nöün Kenas mwän: Otniel me Seraia. Iwe, nöün Otniel kewe mwän: Hatat me Meonotai. 14 Meonotai semen Ofra, nge Seraia semen Joap, i semelapen chon Keharas. Ei leni a iteni ei it, pokiten ekewe aramas mi nom lon ra sipeöch le angang. 15 Iwe, Kalep nöün Jefune we mwän a wor ülüman nöün mwän: Iru, Ela me Naam. Nge nöün Ela we mwän: Kenas. 16 Nöün Jehalelel kewe mwän: Sif, Sifa, Tiria me Asarel. 17-18 Iwe, nöün Esra kewe mwän: Jeter, Meret, Efer me Jalon. Iwe, Meret a pwülüeni Pitia nöün Farao we fefin. Neminei a nöüni eman nengin itan Miriam, me ruoman ät iter Samai me Ispa, i semelapen chon Estemoa. Meret a pwal pwülüeni eman fin Juta. Iwe, a nöüni me won Jeret i semelapen chon Ketor, Heper i semelapen chon Soko me Jekutiel i semelapen chon Sanoa. 19 Iwe, Hotia a pwülüeni fefinen Naham. Nge ekewe mwirimwirin neminei ir lepopun chon ewe eterekesin Karm mi nom lon Keila me chon ewe eterekesin Makat mi nom lon Estemoa. 20 Iwe, nöün Simon kewe mwän: Amnon, Rina, Penhanan me Tilon. Nge nöün Ishi kewe mwän: Sohet me Pensohet. 21 Iwe, Shela eman lein nöün Juta kewe mwän. Ekewe mwirimwirin Shela: Er i semelapen chon Leka, Lata i semelapen chon Maresa me ekewe eterekesin chon angang ngeni mangaku mi pwechepwech mi nom lon Pet-aspea, 22 pwal Jokim me ekewe chon Kosepa, Joas me Saraf mi pwülüeni fin Moap mwen ar liwiniti Petleem. (Ekei uruwo ra seni chök me lomlom.) 23 Ir chokewe mi föri sepi seni pwül, ra imweimw lon Netaim me Ketera o föri ar angang fän iten ewe king.

24 Iwe, ikkei ir nöün Simeon kewe mwän: Nemuel, Jamin, Jarip, Sera me Shaul. 25 Nöün Shaul mwän Salum, nöün Salum mwän Mipsam, nge nöün Mipsam mwän Misma. 26 Ekewe mwirimwirin Misma: Hamuel, nöün Hamuel mwän Sakur, nge nöün Sakur mwän Shimei. 27 Shimei a nöüni engol me wonoman mwän me wonoman fefin. Nge pwin kewe esap nien chomong nöür, iei mine esap pwal chomongola ewe ainangen Simeon usun ewe ainangen Juta. 28 Iwe, ekewe mwirimwirin Simeon ra nom lon Peersepa, Molata, Hasar-sual, 29 Pila, Esem, Tolat, 30 Petuel, Horma, Siklak, 31 Pet-markapot, Hasar-susim, Pet-piri me Saraim. Ikkei ar kewe telinimw tori Tafit a popuetä le nemenem. 32 Iwe, ra nom lon pwal limu telinimw iter Etam, Ain, Rimon, Token me Asan, 33 fiti wisoposopur kewe mi pwelifeili ekei telinimw achöüala ngeni Paalat. Ikkei ar kewe leni ia ra nom ie, a pwal wor uruwon ar kewe lewo. ✡ Jos 19.2-8

34 Iwe, Mesopap, Jamalek me Josa nöün Amasia we mwän, 35 Joel, Jehu nöün Josipia, Josipia nöün Seraia, nge Seraia nöün Asiel, 36 pwal Eli-oenai, Jakopa, Jesohaia, Asaia, Atiel, Jesimiel, Penaia, 37 Sisa nöün Sifi, Sifi nöün Alon, Alon nöün Jetaia, Jetaia nöün Simri, nge Simri nöün Semaia we mwän. 38 Ekei mwän a föü iter ir souemwenin ar kewe cho. Pokiten ar kewe famili ra fokun wattela, 39 iei mine ra sai tori ewe lenien tolong lon Ketor kuku ngeni peliötiuen ewe lemol, pwe repwe kütta enen nöür kewe pwiin sip. 40 Ikenan ra küna enen nöür kewe pwiin sip mi fokun mürina, nge ewe fanü a pwal fokun wäwä, mosonoson me kinamwe. Iwe, chon ewe fanü me mwan ir mwirimwirin Ham. 41 Iwe, lon mwün Hiskia ewe kingen Juta, ekei aramas a fen mak iter ra feito, ra maun ngeni ekewe mwirimwirin Ham o ataela imwer imwen ekewe chon Meun mi nom ikenan. Ra aroserela meinisin, iei mine esap chüen wor mwirimwirir tori ikenai. Iwe, ra lenieni lenier, pun ikenan a wor enen nöür kewe pwiin sip. 42 Iwe, ükükün limepükü mwän seni chon ewe ainangen Simeon ra feila won chukuchukutän ewe fanü Seir, nge nöün Ishi kewe mwän Pelatia, Nearia, Refaia me Usiel ir nöür souemwen. 43 Ikenan ra niela ekewe lusun chon Amalek mi sü ngeni ei leni. Iwe, ra nonom ikenan tori ikenai.